Assimil Cantonese 91-100
- TCO
- Aug 17, 2021
- 4 min read
Updated: Apr 30, 2022
第九十一堂
複習對話翻譯
我聽朝要早啲起身去排隊，幫明仔喺學校登記同辦手續呀。
點解你嘥咁多時間呀？
嗰間係全區最出名嘅小學嚟㗎。
入一間普通學校唔得㗎？
唉(ei3)，冇辦法啦。
佢第時讀大學同做嘢掂唔掂，都視乎佢喺邊度開始讀書㗎。
第九十二堂
投訴
你今日精神唔係幾好喎，面色咁差嘅？對眼重紅哂添。
唔差就假啦，上個周末晚晚都聽到啲噪音，嘈到我瞓唔到覺呀。
環境污染的確係好討厭嘅，有人開P咩？定係開雀局呀？
兩樣都唔係，係個鄰居隻狗亂咁吠就真！
咁你失眠，肯定好辛苦喇。
我初時諗住當聽唔到㗎咋，最後真係忍受唔住，就去咗投訴喇。
練習一翻譯
我最討厭去街市買餸。
呢座大廈附近嘅環境好靚。
頭先你喺郵局寄唔寄到信呀？
今日天氣咁差，不如下個周末先行山啦。
我隻狗連見到壞人嗰陣，都唔識得吠㗎喎。
第九十三堂
肥佬
德仔，聽講你考到車牌啦喎。
肥佬咗三次，正常人都會考到㗎啦。
咁你咪同女友去邊度拍拖都得囉。
唉(hei4)，唔好提啦！我簡直發咗一場惡夢。
究竟咩嘢事呀？
上個禮拜因為超時泊車，畀人罰咗錢，早兩日就連架新車都撞爛埋添。
我一早都勸你買二手車㗎啦。
而家車又拖走咗，女朋友又唔睬我喇。
咁真係喊都無謂啦。
練習一翻譯
我個女淨係掛住上網睇啲無謂嘢。
如果你考到大學，我就送嗰部手機畀你丫。
你哋拍咗拖咁耐，打算幾時結婚呀？
你簡直係一個唔講道理嘅人嚟㗎。
第九十四堂
迷信定係科學
呢間酒店今年又賺大錢啦喎！
係呀，自從佢上市以嚟，啲股價係咁升，邊個買咗佢啲藍籌股票就好彩喇。
我話依啲係全靠佢內外嘅風水好啫。
乜你咁迷信㗎？
唔好咁講，其實環境同人嘅關係係好複雜嘅，風水就係研究呢啲嘢嘅一種科學喇。
我話首先佢嘅位置適中，其次佢嘅設計又有品味，就係咁簡單咋嘛。
練習一翻譯
自從佢嚟到香港以嚟，一直都住喺旺角。
迷信嗰啲人通常都話自己啱嘅。
全靠我朋友嘅爸爸，我終於搵到呢份工喇。
呢個問題好複雜，你可唔可以再解釋吓呀？
啲警察重未知道呢次交通意外同天氣有冇關係。
第九十五堂
萬一
呢兩日周身唔舒服，唔知係咪流行性感冒呢？陣間要去藥房買啲藥喇。
係喎，你面青青咁嘅？唔係豬流感掛？
大吉利是！唔好嚇我啦！
唔怕一萬，最怕萬一啫。都係去睇吓醫生穩陣啲。
雖然我呢排行衰運，但係都冇可能黑得咁交關嘅。
不如入黃大仙廟拜吓神，求吓身體健康丫。
練習一翻譯
嗰個英國人識唱好多好流行嘅廣東歌㗎。
雖然我第一次去外國旅行，但係我一啲都唔擔心。
你咁早起身，又帶生果又帶肉，去拜神呀？
佢太太今朝開始唔舒服，可能就嚟生BB啦喎。
呢張枱唔係幾穩陣，因為有一隻腳壞咗。
第九十六堂
孭鑊
你喺公司連續孭咗兩次鑊，係咪想炒魷魚呀？
你以為我專登㗎？其實我負責嘅嘢越嚟越多，壓力重好大添㗎！
咁即係你辦事能力高，你上司又賞識你啦。
而家我幾乎日日都加班，咁做嘢法，就算係超人都會做到黐線啦。
我建議你禮拜六去郊外，散吓心輕鬆吓，返嚟嗰陣包保你成個醒神哂㗎。
練習一翻譯
我勸咗你去巴士站等車㗎，喺郊外好難截的士㗎。
做嘢做得辛苦嗰陣，我一放工就去游水輕鬆吓。
我喺大學識嗰個死黨，專登喺外國返嚟飲我嘅喜酒㗎。
呢個人黐線嘅，唔好睬佢呀。
雖然佢好叻，但係冇人賞識佢。
第九十七堂
環保
既然人人都有權住喺呢個地球度，咁個個都應該保護環境丫。
只要每人都肯改變少少生活習慣，大家就可以享受綠色啲(dit1)嘅大自然同埋乾淨嘅城市啦。
係呀，例如掉少啲嘢，又製造少啲垃圾。
再用同回收廢物，都好重要㗎。
去超級市場買嘢要帶環保袋，換電器就要揀適合自己需要同慳電嘅。
重要鼓勵啲小朋友一齊參與添，就同投票一樣，呢啲係每個市民嘅責任嚟㗎。
練習一翻譯
你應該鼓勵你媽媽每日都做多啲運動㗎。
我上次搬屋嗰陣唔知掉咗幾多舊書。
呢間公司賣嘅衫全部都係喺中國製造嘅。
結婚一定要揀個最適合你嘅男仔㗎。
好多人都喺超級市場買餸，因為乾淨啲丫嘛。
第九十八堂
複習對話翻譯
你識唔識好似廣東人咁炒飯呀？
好簡單啫，首先你洗好米，煮好飯。
聽講飯要煮得乾，但係唔好爛㗎喎。
其次就要準備其他材料喇，例如豬肉呀、蛋呀、青豆呀等等。
落海鮮都唔錯㗎。
最後咪一齊炒到香哂咁囉！
唔好唔記得，鑊要燒紅先喎。
我以為你唔識炒飯㗎？
第九十九堂
急口令
一蚊一隻龜，七蚊一隻雞。
佢話龜貴過雞，我話雞貴過龜。
咁究竟龜貴過雞，定係雞貴過龜？
街頭三蚊一斤雞，街尾三蚊一斤龜。
街頭買斤雞，街尾買斤龜。
你話雞貴定係龜貴？
練習一翻譯
而家水費咁貴，唔好亂嘥水呀！
我上個禮拜畀人罰咗四百蚊呀。
第二度嘅雞尾包係冇雞尾嘅包嚟㗎。
喺街市賣嗰啲雞新鮮啲。
點解信風水嗰啲人咁中意龜嘅？
第一百堂
加油！
學咗咁耐廣東話，終於嚟到呢本書嘅最後一堂喇。
恭喜你！呢幾個月來（嚟），咁有恆心，重日日都進步緊添！
俗語有話，學無止境，尤其是語言係跟住社會變化嘅。
所以學到一百歲都未學完㗎！
我哋喺度好鼓勵你，以後隨時睇返呢本書，做返啲練習。
重要聽多啲講多啲，咁就一定成功㗎喇，繼續努力加油呀！
練習一翻譯
學寫中文字一定要有恆心。
今日市中心度會有好多人㗎，尤其是中午嗰陣添。
呢班人通常都識講三四種語言㗎。
佢想繼續做嘢，唔同我哋食晏喇。
我阿哥話明仔踢波進步得好快喎。
Comments