Assimil Cantonese 81-90

第八十一堂

興趣

你個女近排有乜嘢興趣呀？

唉，放咗學一返嚟就着佢部電腦，成日上網，去啲聊天室度同人哋傾偈。

除咗上網之外呢？

佢唔上網嗰陣重慘，淨係識得煲粥。

點解咁慘呀，佢煲啲粥好難食呀？

唉，煲電話粥呀。

練習一翻譯

除咗親戚之外，我乜嘢人都唔見。

我呢行成日都要用電腦㗎。

有啲後生仔連對自己嘅文化都冇興趣。

阿華一出糧就畀哂啲錢佢老婆啦。

呢個聊天室係傾BB方面嘅嘢嘅。

第八十二堂

跌打

達仔啱啱撞親膝頭哥咋，跟住又扭親腳眼。

成日咁樣受傷唔掂㗎喎。

究竟佢重應唔應該踢足球㗎？

聽日帶佢去睇吓跌打先，踢唔踢波就等佢好返先講啦。

練習一翻譯

又攰又凍嗰陣，浸吓腳就成身暖哂喇。

佢係一個一流嘅足球明星嚟㗎。

呢條街嘅跌打醫生好出名㗎。

究竟廁所喺左便定係右便呀？

你家姐對鞋咁高，唔扭親腳就奇怪喇。

第八十三堂

塞車

今晚嘅中秋晚會一定唔錯嘅。

咁食埋啲春卷，就換衫出去啦喎。

唔駛咁心急丫。趁暖暖哋飲埋碗湯先啦。

唔係㗎，次次公眾假期同節日嗰陣，周圍都塞車㗎。

練習一翻譯

除咗飲茶之外，廣東人重好中意飲湯添。

有冇一日係全世界嘅公眾假期嚟㗎？

下個禮拜五，喺學校有一個新年晚會。

夏天着冷氣，冬天就着暖氣。

下次探阿愛嗰陣，送一盒蛋卷畀佢丫。

第八十四堂

複習對話翻譯

我就最中意新年喇。

因為全香港都有三日公眾假期，係唔係呀？

我淨係唔駛返工先至開心㗎咩？未放假嗰陣，成街啲舖頭唔知幾靚。

放完假，個個重好似發咗達咁樣添。

梗係啦，因為人人見面嗰陣都講恭喜發財丫嘛。

第八十五堂

寄信

大威，你陣間去郵局，我拜託你寄幾封信，得唔得呀？

你講笑呀？咁大疊信，你叫做幾封？

其實我有大把電費單、水費單，同埋一大堆乜費物費，過兩日就到期㗎啦。

咁我建議你貼定啲郵票，等我唔駛嘥時間排隊丫嘛。

練習一翻譯

今日個個都出糧，喺銀行要排好耐隊㗎。

呢疊書我細佬已經全部睇哂喇。

我阿媽建議我喺出入口嗰方面搵工。

你成日淨係識得講笑，我而家唔再信你喇。

尋日睇咗嗰部戲好冇意思，又嘥錢，又嘥時間。

第八十六堂

賊仔

九九九緊急熱線。

喂，警察局呀？我對面鄰居嗰間屋度，有個賊仔入咗去偷嘢呀！

你係咪完全肯定？佢（係）唔係你鄰居嘅家人嚟㗎？

哎吔，慘喇，佢唔停咁摷，重搞到成屋亂哂添呀。

你冷靜啲先。講清楚你鄰居嘅地址，同埋嗰個賊仔嘅外型、特徵等等。

我哋會即刻派人嚟㗎喇。

練習一翻譯

你成日都冇心機讀書，係咪第二時想做賊仔呀？

我個鄰居係教書嘅，佢梗係識得揀間好嘅大學啦。

睇清楚同唔好唔記得佢個車牌冧把呀。

我部電腦壞咗，一定要打呢間公司嘅熱線搵人幫我。

佢連佢阿哥有咩嘢特徵都唔知道。

第八十七堂

時間就係金錢

對我哋做經紀嘅人嚟講，每一分每一秒都咁寶貴㗎。

哦，咁俗語都有話，時間就係金錢丫嘛。

所以我最憎搭公眾交通工具㗎喇，又迫人，又慢吞吞。

我就唔係幾同意喇，好多時喺市區就算想快都冇辦法㗎喎。

截的士咪方便囉。

繁忙時間嗰陣，架架的士都滿哂㗎啦。

練習一翻譯

我屋企好方便㗎，地鐵就喺樓下啫。

呢架火車慢吞吞嘅，幾時先去到廣州㗎？

如果你唔講清楚你嘅理由，我唔會同意你出去嘅。

對一個細路仔嚟講，呢本書嘅字太細喇。

就算你肚餓都唔應該食啲凍飯㗎。

第八十八堂

急症

小姐，我個女發燒，發到差唔多四十度呀。

喺度攞張飛仔先，輪到你嗰陣，就用身份證登記啦。

唔可以搵醫生檢查佢先咩？

先生，個個病人都要辦手續先㗎！

但係係急症嚟㗎喎？

哦，我諗你搞錯咗喇，呢度係普通門診咋喎。

咁急症室喺邊度呀？

就喺新嗰座大廈咋嘛，你向左邊行，轉個彎就去到㗎喇。

練習一翻譯

聽日早啲去大學登記啦，要排好耐隊㗎。

我張戲飛好似過咗期喎，唔用得喇。

你轉兩次彎，跟住直行啦。

我一啲都唔想出名，做一個普通人就開心喇。

佢真係怪怪哋呀，連嗰個警察都查咗佢張身份證。

第八十九堂

跑馬

今日又係跑馬嘅日子喇。

即係話啲男人又會淨係掛住搵貼士，聽住收音機，同睇住份馬報㗎啦。

我老公連電視轉播都唔中意，直情入埋馬場睇現場賽馬添。

咁究竟佢贏過錢未啫？

賭錢嘅嘢係視乎運氣嘅，不過老實講，佢通常都輸㗎。

練習一翻譯

呢個時間通常都塞車㗎，不如行第二條街啦。

因為佢賭錢，佢老婆先至唔再同佢一齊咋。

阿女嘅男朋友好老實，我覺得佢真係唔錯。

一個人考試考得好唔好，係視乎佢讀書有冇心機嘅。

你細佬跑步輸咗呀？

第九十堂

偶像

呢排你搞緊邊個歌星嘅演唱會呀？

咪你個偶像嘅囉！而家安排緊佢年底個騷啲嘢。

吓，真㗎？

我數一數手指，都睇過佢嘅表演五六次左右啦，次次都冇得彈嘅。

今年我包保你都唔會失望㗎。

咁你幫我留住幾張飛，得唔得呀？

我哋咁死黨，點會託你手踭呀？

練習一翻譯

你行多兩分鐘左右，就去到地鐵站㗎啦。

我建議聽日開會傾吓點樣安排下個月嘅事。

我唔想阿爸失望，所以講咗大話。

你唔習慣着高踭鞋，咁就要慢慢行喇。

我女友話我唱歌冇得彈喎。